(1) Суралцагч нь дараах санаануудыг тайлбарлаж чаддаг болсон байна. Үүнд:

• Орчлон ертөнц нь Гурвалын мөн чанарыг харуулах зураглал болдог талаар

• Гурвалын талаарх онол сургаалын Библийн үндэс

• Гурвалын талаарх онол сургаал нь яагаад сайнмэдээний үндэс болдог тухай

• Гурвал хоорондын харилцааны бүтэц

• Гурвал нь хүмүүс хоорондын харилцааны жишээ загвар болдог талаар

• Гурвалд итгэх бидний итгэл үнэмшил хэрхэн мөргөл хүндэтгэлд дагуулдаг тухай

• Гурвалын талаарх христэч итгэл үнэмшил

(2) Суралцагч нь Гурвалыг тайлбарлахдаа хүмүүсийн гаргадаг нийтлэг алдаанаас зайлсхийж сурна.

► Иохан 14-р бүлгийг хамтдаа уншаарай. Бурхан Гурвал болохыг энэ багц эшлэлд хэрхэн харуулсныг ярилц.

Гурвалын талаарх онол сургаал нь нэг талаас Бурханыг ганц, нөгөө талаас гурав гэж хэлдэг учраас олон хүмүүс төөрөлддөг.

Гэхдээ бид орчлон ертөнцийн зүй тогтлоос нэг зүйл дотор буй гурвалын жишээг ажиглах боломжтой. Орчлон ертөнц нь орон зай, цаг хугацаа ба матери гэсэн гурван хэсгийг агуулдаг. Энэ гурвын аль нэг нь үгүй бол орчлон ертөнц байх боломжгүй юм.

Энэхүү гурав нь тус бүрдээ гурван хэсгээс бүрдэх боломжтой.

Орон зай нь урт, өргөн, өндөр гэсэн нэгийн доторх гурвалыг багтаадаг. Энэхүү гурван чиглэлийн аль нэг нь үгүй бол орон зай байх боломжгүй.

Цаг хугацаа нь өнгөрсөн, одоо, ирээдүй хэмээх нэгийн доторх гурвалаас бүрддэг. Энэхүү гурван хамрах хүрээний аль нэг нь үгүй бол цаг хугацааг тодорхойлох боломжгүй.

Матери нь үзэгдэл юмсыг бүтээдэг хөдөлгөөний энерги хэмээх нэгийн доторх гурвалаас мөн бүрддэг. Хэрэв энерги үгүй бол хөдөлгөөн болон үзэгдэл юмс байх боломжгүй. Хэрэв хөдөлгөөн үгүй бол энерги болон үзэгдэл юмс ч байх боломжгүй юм. Нөгөөтэйгүүр, үзэгдэл юмс байхгүй байгаа нь хөдөлгөөн болон энерги байгаагүйтэй холбогдох байсан болов уу.

Тэгэхээр орчлон ертөнцийн зүй тогтлыг харвал нэгийн доторх гурвалын загвараар бүтээгдсэн мэт харагддаг. Бурхан Өөрийн мөн чанарыг дүрслэн харуулахын тулд орчлон ертөнцийг загвар болгон ийнхүү бүтээсэн ч байх боломжтой.

Тэгвэл Библи Гурвалын талаар юуг өгүүлдэг вэ? Орчлон ертөнцийг бүтээсэн нэг Бурхан гурван өөр ялгаатай бодгаль байдлаар оршдог гэдгийг тодорхой тайлбарладаг. Бурхан бол нэг бодгаль төдийгүй гурван бодгаль ч мөн гэж хэлээгүй учраас энэ санаанд зөрчил байхгүй. Нөгөөтэйгүүр, Бурхан бол нэг Бурхан ба гурван Бурхад ч гэж бид хэлэх боломжгүй юм. Харин бид Бурханыг бодгаль байдлаараа гурав, мөн чанараараа нэг Бурхан хэмээн хэлэх боломжтой. Энэ нь нэг орчлон ертөнц орон зай, цаг хугацаа, матери байдлаар оршдог шиг нэг Бурхан Эцэг, Хүү, Ариун Сүнс байдлаар оршдог.

Үндэслэл 1: Цорын ганц Бурхан байдаг.

Сонс, Израиль аа! ЭЗЭН бол бидний Бурхан бөгөөд ганц ЭЗЭН (Дэд хууль 6:4).

Учир нь Би Бурхан, өөр байхгүй. Би Бурхан. Надтай ижил нь үгүй (Исаиа 46:9).

Үндэслэл 2: Эцэг, Хүү, Ариун Сүнс бүгд Бурхан.

Эцэг Бурханаар (Галат 1:1).

Үг нь Бурхан байв... Үг нь махбод болж (Иохан 1:1, 14).

зүрх чинь яагаад Сатанд автаж… Ариун Сүнсэнд худал хэлэв? Чи хүнд биш харин Бурханд худал хэллээ гэв (Үйлс 5:3-4).

Үндэслэл 3: Гурвал нь ялгаатай бодгаль байдлаар бие биетэйгээ харилцдаг.

► Бид тэдгээрийг өөр өөр үүрэг оролцоо бүхий нэг бодгаль биш, харин гурван бодгаль гэдгийг хэрхэн мэдэж болох вэ?

Марк 1:10-11-д Есүсийг баптисм хийлгэх үед Ариун Сүнс Түүн дээр тагтаа мэт буун ирж, тэнгэрээс “Хайрт Хүү минь Чи билээ. Таалал минь Чамд оршдог” хэмээн хэлэх дуун сонсогддог. Бид эндээс Эцэг, Хүү, Ариун Сүнс нь нэг бодгаль байгаагүй болохыг, мөн нэг цаг хугацаанд өөр өөр үүргээр оролцоогүйг харж болно.

Үйлчлэлийнхээ эцэст Есүс, Эцэгээс өөр нэгэн Туслагч болох Ариун Сүнсийг бидний төлөө асуух болно гэж хэлсэн байдаг (Иохан 15:26). Энэхүү хүсэлтэд хоорондоо ялгаатай гурван бодгаль оролцож байгааг та анзаарч байна уу?

Хэрэв та Иохан 14-17-р бүлгийг уншвал тэндээс Эцэг, Хүү, Ариун Сүнс хоорондын харилцаа хамаарлын талаар ихийг харж болно.

Дүгнэлт: Библийн нэг үнэн Бурхан Өөрийгөө Эцэг, Хүү, Ариун Сүнс гэсэн ялгаатай гурвалаар оршдог болохоо илчилжээ. Бурхан мөн чанарын хувьд нэг, харин бодгалийн хувьд гурвал юм.

Иймд, хэдийгээр Гурвал гэдэг үг Библид байдаггүй ч Гурвалын талаарх онол сургаал нь тов тодорхой бичвэрийн хэсгүүдэд үндэслэгддэг. Энэхүү онол сургаалын талаар Библид заадаг бүхнийг бид хураангуйлж үзэхдээ Гурвал гэсэн нэр томъёог ашигладаг.

Библийн энэхүү онол сургаалыг чуулган элч нараас хойш заасаар иржээ. Зуун зууны туршид чуулган Гурвалыг тайлбарлахдаа ашиглаж ирсэн хүснэгтийг энд харуулсан байна.

► Гурвалд итгэх, итгэхгүй байх нь яагаад тийм чухал юм бэ?

Гурвалын талаарх онол сургаал нь сайнмэдээний үндсэн чухал сургаалын суурь болдог. Жишээлбэл, Гурвалыг үгүйсгэдэг зарим хүмүүс Есүс Бурхан гэдгийг үгүйсгэдэг. Гэвч, хэрэв таны итгэдэг Есүс Бурхан биш бол таныг аврах Есүс танд байхгүй гэсэн үг! Зөвхөн нүгэлгүй хүн л бүх хүмүүсийн нүглийн төлөө үхэж чадна. Бид хязгааргүй Бурханы эсрэг нүгэл үйлдсэн учраас Түүний золиос ч мөн хязгааргүй байх ёстой. Есүс Бурхан байсан учраас бүх цаг үеийн бүх хүмүүсийн нүглийн төлөөсийг нүгэлгүй, хязгааргүй золиосоороо хангаж өгсөн юм.

Хэрэв бид Эцэг, Хүү, Ариун Сүнс нь ялгаатай гэдгийг үгүйсгэвэл Бурханы төрөлхийн бодгаль шинж болон харилцааны шинж чанаруудыг нь ч үгүйсгэх болно. Жишээлбэл, Бурхан хэн нэгнийг хайрлахын тулд түүнийг бүтээх хүртлээ хүлээх хэрэгтэй байсансан бол өнө мөнхөд хайраар дүүрэн Бурхан байх боломжгүй болно. Харин Бурхан нэгээс олон бодгалиар оршиж байж тэдгээр бодгалиуд нь бие биенээ өнө мөнхөд хайрлаж чадна. Ийм харилцаанд байдаг Бурханд (өөрийгөө зориулдаг хайр дотор орших) итгэх нь их чухал юм. Учир нь энэ нь бидний бие биетэйгээ болон Бурхантай харилцах харилцаанд нөлөөлдөг.

Үүнтэй холбоотой магадгүй хамгийн нухацтай авч үзэх тал нь бид Бурханыг мөргөн хүндэтгэх ёстой гэсэн ойлголт. Гурвалыг үгүйсгэдэг хүмүүс ихэвчлэн Есүс болон Ариун Сүнс нь Бурхан гэдгийг үгүйсгэдэг учраас тэдэнд мөргөл хүндэтгэл өргөдөггүй. Хүний гаргаж болох хамгийн том алдаа бол Бурхан биш хэн нэгнийг хүндэтгэн мөргөх, эсвэл Бурхан нэгнийг хүндлэн мөргөхгүй байх нь юм.

Жон Стоттын өдөр бүрийн Гурвалд хандах залбирал

Тэнгэрлэг Эцэг минь, би энэ өдөр Таны оршихуйд амьдарч, Таныг улам ихээр баярлуулахыг хүсэн залбирч байна.

Эзэн Есүс ээ, би энэ өдөр загалмайгаа үүрч, Таныг дагахын төлөө залбирч байна.

Ариун Сүнс ээ, энэ өдөр Та намайг Өөрөөрөө дүүргэж, миний амьдралд хайр, баяр баясгалан, амар тайван, тэвчээр, энэрэл, сайн сэтгэл, итгэмжит байдал, дөлгөөн зан, өөрийгөө захирах Таны үр жимсийг ургуулж өгөхийг хүсэн залбирч байна.

Ариун, ерөөлт, суу алдарт, нэг Бурханы доторх гурван бодгаль Гурвал минь, намайг өршөөн соёрхооч.

Орчлон ертөнцийг бүтээгч, тэтгэгч, Төгс Хүчит Бурхан, би Таныг мөргөн хүндэтгэж байна.

Дэлхийн Аврагч, Эзэн Есүс Христ, би Таныг мөргөн хүндэтгэж байна.

Бурханы ард түмнийг ариусгагч Ариун Сүнс, би Таныг мөргөн хүндэтгэж байна.

Эцэг, Хүү, Ариун Сүнсэнд алдар нь эхэнд байсан шиг өдгөө ч, өнө мөнхөд байх болтугай, Амен.

Эцэг, Хүү, Ариун Сүнс нь тус бүрдээ бодгаль шинж чанартай бөгөөд бие биетэйгээ үргэлж хувийн харилцаатай байдаг. Тэд бие биетэйгээ холбоотой амьдардаг учраас бид тэднийг бодгаль гэж нэрлэдэг. Тэд бие биенээ хайрлаж, бие биедээ өгч, бие биетэйгээ ярилцаж, бие биенийхээ төлөө амьдардаг. Энэ нь тэд бодгалиуд гэдгийг харуулж байна.

Гурвал дахь бүтэц

Эцэг, Хүү, Ариун Сүнс үргэлж харилцааны бүтцэд оршсоор иржээ. Эцэг нь тэргүүн, дараа нь Хүү, тэгээд Сүнс юм. Энэхүү мөнхийн Гурвалын ижил тэнцүү бодгалиуд нь бие биетэйгээ харилцах харилцаандаа тулгуурласан эрх мэдэл, байр суурьтай. Энэхүү эрх мэдлийн бүтэц нь чуулганд болон гэр бүлд тусгагдсан байдаг. Гурвалын гишүүдийн нэгэн адил чуулганы болон гэр бүлийн бүх гишүүд нь ижил үнэ цэнтэй боловч бүгд адил хэмжээний эрх мэдэл, байр суурьтай байдаггүй.

Хүү Эцэгтэйгээ харилцах харилцаа

Хүү Эцэгтэйгээ хэрхэн харилцдаг вэ? “Эцэгт Өөрт нь амь байдгийн адил мөн Хүүд Өөрт нь амь байлгахыг Хүүдээ Тэр соёрхжээ” хэмээн Есүс хэлсэн байдаг (Иохан 5:26). Хүү нь өнө мөнхөөс Эцэгийн цорын ганц Хүү байсаар ирсэн (Иохан 3:16). Хүү нь Бурханы адил мөнхөд Өөрөөрөө оршдог бөгөөд Эцэгтэй ижил мөн чанартай хэдий ч Түүний оршин тогтнол нь Эцэгээс иржээ. Хүү нь өнө мөнхөд Эцэгтэйгээ Хүүгийн харилцаанд байдаг бол Эцэг нь бие махбодын хувьд биш ч гэсэн Хүүтэйгээ Эцэгийн харилцаанд байдаг. Есүс мөн чанараараа Эцэгтэйгээ эн тэнцүү юм. Тэр Эцэгтэйгээ адил түвшинд алдар, хүндлэлийг авдаг. “Энэ нь бүгд Эцэгийг хүндэлдгийн адил Хүүг хүндлэхийн тулд юм” хэмээн Есүс хэлжээ (Иохан 5:23).

Ариун Сүнс Эцэгтэй болон Хүүтэй харилцах харилцаа

Иохан 15:26-д Есүс бидэнд Эцэгээс гарах Ариун Сүнсийг илгээнэ гэж хэлсэн байдаг. Сүнс хэдийгээр Эцэгээс гаралтай ч Тэр Эцэгтэй, Хүүтэй эн тэнцүү бөгөөд ижил алдар хүндтэй юм. Энэхүү гарал үүсэл болон илгээгдэж байгаа нь бие биетэйгээ хайрын харилцаанд оршдог гурван бодгалиудын хооронд болж байгааг анзаараарай.

Бурханы нэгдмэл байдлыг хамгаалах нь

Гурвалын гурван бодгалийг салангид тусдаа хувь хүмүүс гэж үзэх ёсгүй юм. Тэдний оршин байгаагийн нэгдмэл байдал гэдэг нь тэд ижил мөн чанартай бөгөөд гурван бодгаль бие биедээ нэвтэрч, оршин, өөр хоорондоо шинж чанаруудаа хуваалцдаг гэсэн утгатай. Эцэг, Хүү, Ариун Сүнс нь хүмүүн бидний хувьд боломжгүй тийм байдлаар бие биеийнхээ дотор оршдог.

Хүн бүр зөвхөн нэг бодгаль бөгөөд цорын ганц оршихуй юм. Харин Бурхан бол гурван бодгаль хэдий ч цор ганц оршихуй билээ. Бурханы нэгдмэл байдлын тухай Библийн үзэл баримтлалыг хамгаалахын тулд Гурвалын гишүүдийг бие биенээсээ салангид тусдаа (хүмүүс) биш, харин өөр ялгаатай (бодгалиуд) хэмээн бид ярьдаг.

Бурхан биднийг Өөрийн дүр төрхөөр, бие биетэйгээ болон Бурхантай харилцах чадвартайгаар бүтээсэн. Бидний хүн нэг бүрд харилцахын тулд оюун ухаан, хүсэл, сэтгэл хөдлөл бий.

Хувь хүнийхээ хувьд бид бүрэн бус

Бурхан Адамыг бүтээснийхээ дараа түүнд “Хүн ганцаараа байх нь сайн биш” хэмээн хэлжээ (Эхлэл 2:18). Дараа нь Тэр Еваг бүтээв. Адам Евагүйгээр бүрэн бус байв. Учир нь түүнгүйгээр Адамд өөр харилцах хүн байсангүй. Чухамдаа Адам болон Ева хамтдаа Бурханы дүр төрхийг тусган авсан гэсэн санааг бичвэрт “Ийнхүү Бурхан Өөрийнхөө дүр төрхөөр хүнийг бүтээж, Бурханы дүр төрхөөр бүтээхдээ эр эмээр нь бүтээжээ” гэсэн байдаг (Эхлэл 1:27). Адамд өөрт нь байснаас ч илүү, Адам, Ева хоёрын харилцаанд хамтдаа Бурханы дүр төрхийг тусгасан ямар нэгэн зүйл байсан бололтой.

Энэ нь бидний хувьд ямар утгатай болохыг бодож үзээрэй. Гурвалын бодгалиуд шиг бусадтай харилцахгүй л бол бид бүхэл бүтэн хүн байж чадахгүй. Энэ нь бид заавал гэрлэх ёстой гэсэн үг биш (тэнгэрийн улсад хэн ч гэрлэхгүй, гэхдээ бид бодгаль хэвээр байх болно), харин бид бусадтай нөхөрлөх хэрэгтэй юм.

Бурханы дүр төрхийг тусгах талаар

Бурханы мөн чанар болон чуулганы мөн чанарыг хооронд нь харьцуулсан гайхалтай харьцуулалт байдаг. Бурхан болон чуулганы аль алинд нь нэгдмэл болон онцлог ялгаа бүхий талууд бий. 1 Коринт 12-р бүлэгт Христийн Биеийг зорилгынхоо төлөө хамтдаа ажилладаг олон хэсгээс бүрдсэн нэгдэл болохыг хэлсэн. Христийн Бие Бурханы дүр төрхийг хэрхэн тусган харуулж байгааг та харж байна уу? Паул чуулганы янз бүрийн гишүүд хамтдаа Христ дотор нэг болж өсөхийг хүсэмжилж байсан. Паул биднийг ийм байгаасай гэж залбирчээ:

үнэнийг барьж, ингэхдээ харин хайранд, тэргүүн болох Түүн өөд, Христ өөд бүх талаар өсцгөөе. Хэсэг нэг бүрийн зохистой үйл ажиллагааны дагуу холбоос болгоноос хангаж байдаг зүйлээр хамтдаа холбогдон нийлж буй бүхэл бие нь Христээр хайр дор өөрийгөө босгон барихын тулд биеийн өсөлтийг бий болгодог (Ефес 4:15-16).

Бид бүгдээрээ Христийн нэгдмэл байдалд өсөхөд бие биедээ туслахын тулд өөрсдийн бэлэг авъяас, чадвараа ашиглах ёстой. Нигүүлсэл дотор өсөхөд нь бие биедээ туслах байдлаар бид Түүний харилцааны мөн чанарыг тусган харуулахыг Бурхан хүсдэг. Сүнслэг өсөлт нь бусад итгэгчидтэй ойр дотно нөхөрлөлд өөрсдийгөө зориулж буй хамт олны дунд явагддаг. Энэ нь Бурханы нийтэч хамтын мөн чанарыг тусган харуулдаг.

Гурвалын гишүүд нь мөнхөд бие биедээ өөрсдийгөө зориулах хайр дотор амьдарч байгаа шиг бид ч бусадтай хайрын харилцаанд амьдрах учиртай юм. Бид Бурханы дүр төрхөөр нийгмийн харилцаанд байхаар бүтээгдсэн тул өөрөөсөө илүү бусдад анхаарал хандуулах хэрэгтэй. Бид хувийн онцлогоос илүүтэй хамт олныг чухалд тооцох ёстой. Бид бусадтай харилцах харилцаандаа Түүний Гурвалын дүр төрхийг тусгахыг хичээх үед Бурхан биднийг ерөөх болно.

Гурвалыг мөргөн хүндэтгэх нь Ариун Сүнсний тусламжтайгаар, Хүүгийн эвлэрүүллийн ажлын үндсэн дээр Эцэгийн өмнө ирдэг гэдгийг бид хүлээн зөвшөөрдөг. Гурвалыг хүндлэгчдийн хувьд бид Хүүгээр дамжуулан, Сүнс дотор, Эцэгт залбирдаг.

Мөргөл хүндэтгэлийн чухал зорилго бол Гурвалын гишүүд бие биенээ хайрладаг тэрхүү хайрын харилцаанд орох явдал юм. Эцэг Хүүгийн хооронд байдаг хайрын талаар бодож үзээрэй. Энэхүү хайрыг таньж мэдэхийн тулд Христ загалмай дээр юу хийснийг эргэцүүлээрэй. Эцэг Хүү хоёр гайхалтай харилцаан дотор хамт амьдардаг бөгөөд Хүүгийн эвлэрүүллийн ажлын улмаас Сүнс биднийг тэрхүү дотно хайрын харилцаанд ороход тусалдаг.

Гурвалыг хүндлэгчдийн хувьд бид зөвхөн Эцэгт, Сүнс дотор, Хүүгээр дамжуулан залбираад зогсохгүй, Эцэгт, Хүүд, мөн Сүнсэнд хандан залбирдаг. Гурвалын гишүүн бүрийг хүндлэн биширч, алдаршуулах ёстой. Учир нь тэд бүгд Бурхан бөгөөд адил тэнцүү өргөмжлөгдөх зохистой. Гурвалыг мөргөн хүндэтгэх нь Гурвалын гишүүн бүрд адил тэнцүү алдар хүндлэлийг авчирах бөгөөд бидний авралд тэд ямар үүрэг гүйцэтгэдэг болохыг хүлээн зөвшөөрч буй хэрэг юм.

Ангийн удирдагчийн тэмдэглэл: Бүлгийн нэг гишүүн энэхүү хэсгийг тайлбарлана уу.

Үр яагаад шороонд ургадаг, тархи хэрхэн ажилладаг, ямар хүч оддыг байранд нь байлгадаг зэргийг бид ойлгодоггүй. Эрдэмтэд юу болж байгааг ажигладаг ч яагаад, хэрхэн энэ бүхэн тохиолдож буйг тайлбарлаж чаддаггүй. Хүн Гурвалын талаарх онол сургаалыг бүрэн тайлбарлаж чадахгүй учраас үүнийг үгүйсгэх нь утгагүй юм. Бурханы талаарх онол сургаал бүр бидний тайлбарт баригдахгүй, үүнийг даван гардаг. Жишээлбэл, Бурхан хэрхэн хаа сайгүй байж, бүх зүйлийг мэддэг болохыг хэн ч тайлбарлаж чадахгүй. Гурвалын талаарх баримтууд нь огт логикгүй биш боловч тэдгээр нь хүний томъёолол болон мэдлэг туршлагыг ч давсан байдаг. Далайн загас хэдий ухаантай байгаад түүнд тайлбарлан хэлсэн ч, хүн байх ямар байдгийг хэзээ ч ойлгож чадахгүйтэй адил.

Гурвалын талаарх баримт нь мөн чанараараа болон бурхан чанараараа ижил тэнцүү гурван бодгаль дотор оршдог нэг Бурханы тухай юм. Хүмүүс үүнийг тайлбарлах гэж оролдсон боловч ихэнхдээ гол чухал хэсгийг нь орхигдуулдаг. Тэдгээр зарим алдааны жишээг энд дурдъя.

1. Бурхан бол өөр өөр үүрэг гүйцэтгэдэг үнэхээр нэг бодгаль юм. Энэ онолын дагуу Бурхан тэнгэрт Эцэг, газар дээр Есүс байсан бөгөөд одоо Ариун Сүнс болон бидэнд ярьж байна гэж үздэг. Гэвч Иохан 14-16-р бүлэгт Есүс Өөрийгөө Эцэгтэй, Ариун Сүнстэй аль алинтай нь харилцаж байгаагаар дүрслэн өгүүлсэн байдаг. Хэрэв тэд гурван өөр бодгаль биш байсан бол энэ тайлбар утгагүй болно.

2. Эцэг, Хүү, Ариун Сүнс нь салангид тусдаа оршихуй юм. Энэ онолын дагуу тэдний мөн чанар ялгаатай байж болно гэж үздэг. Жишээлбэл, Эцэг нь шүүхийг хүсдэг бол харин Хүү нь өршөөл үзүүлэхийг хүсдэг гэх мэт. Энэ санаа нь цорын ганц Бурхан байдаг гэсэн Библийн онол сургаалтай зөрчилддөг.

3. Гурвалын нэг нь нөгөөгөөсөө доогуур зэрэглэлд байдаг. Энэ онолын дагуу Эцэгийг Бурхан, харин Хүү болон Ариун Сүнс нь арай дорд оршихуй гэж үздэг. Ингэж итгэдэг хүн Ариун Сүнсний бодгаль шинжийг үгүйсгэж, Хүүг Бурханд хэрэглэгдсэн онцгой нэгэн хүн байсан хэмээн боддог. Энэхүү алдаа нь хүмүүсийг Хүү болон Ариун Сүнсийг Бурхан гэж мөргөн хүндэтгэхгүй байх шалтгаан болж, улмаар тэднийг хуурамч сайнмэдээ рүү дагуулж болзошгүй юм.

► Итгэлээ шалгах хэсгийг хамгийн багадаа хоёр удаа хамтдаа уншаарай.

Бурхан бол Гурвал бөгөөд Эцэг, Хүү, Ариун Сүнс гэсэн гурван бодгалиар орших нэг Бурхан юм. Гурвал нь үүргийн хувьд ялгаатай ч, мөн чанараараа ижил, бурхан чанараараа эн тэнцүү, адил хэмжээнд мөргөл хүндэтгэлийг хүртэх зохистой Нэгэн мөн.

(1) Эшлэл унших: Суралцагч тус бүр дараах эшлэлүүдээс нэгийг сонгоно. Дараагийн хичээл эхлэхээс өмнө эшлэлийг уншиж, энэхүү хичээлийн сэдвийн талаар тус эшлэлд юу гэж хэлснийг багцлан бичнэ.

• Иохан 15:26

• Иохан 17:1-5

• Ефес 1:17-23

• Колоссай 1:12-19

• Еврей 1:1-3, 8

(2) Сорил: Дараагийн хичээлийг 3-р хичээлийн сорилоор эхэлнэ. Сорилд бэлтгэж, асуултыг сайн судлаарай.

(3) Бусдад заах: Ангиас гадуур заах хуваарь гаргаж, тайлагнахаа мартуузай.

(1) Орчлон ертөнц хэрхэн Бурханы мөн чанарыг дүрслэн харуулдаг вэ?

(2) Гурвалын талаарх онол сургаалын суурь болсон гурван үндэслэл юу вэ?

(3) Гурвал хоорондын харилцааны бүтэц юу вэ?

(4) Гэр бүл болон чуулганы бүтцийг Гурвалын бүтэцтэй хэрхэн харьцуулж болох вэ?

(5) Гурвалд итгэгчдийн хувьд бид хэнд хандан залбирах ёстой вэ?

(6) Гурвалын талаарх нийтлэг гурван буруу онол сургаалыг нэрлэнэ үү?