(1) Суралцагч нь дараах санаануудыг тайлбарлаж чаддаг болсон байна. Үүнд:

• Есүс бол Мессиа гэдэг нь юу гэсэн утгатай вэ?

• “Эзэн Есүс Христ” гэсэн хэллэг дэх итгэлийн тодорхойлолт.

• Есүсийн хүмүүн чанарын нотолгоо ба үүний ач холбогдол.

• Есүсийн бурхан чанарын нотолгоо ба үүний ач холбогдол.

• Нүглийг уучлахад Христийн үхэл хангалттай болох нь.

• Христитгэл дэх амиллын ач холбогдол.

• Христийн талаарх христэч итгэл үнэмшил.

(2) Суралцагч нь зарим шашны хүмүүс Христийн талаар юу өгүүлсэн байдгийг мэдэж авна.

► Илчлэл 5:11-14-ийг хамтдаа унших. Энэхүү багц эшлэлд Есүсийн талаар юу гэж хэлсэн бэ?

Эцсийн өдрүүдэд хуурамч христүүд болон хуурамч эш үзүүлэгчид олныг хуурч мэхлэх болно гэж Библид урьдаас өгүүлжээ. Олон хүмүүс өөрсдийгөө аварч чадахгүй хуурамч, төсөөллийн христүүдэд итгэж найдсаар байна. Та магадгүй мормончууд болон Еховагийн гэрчүүдийн танилцуулсан эдгээр хоёр хуурамч христүүдтэй ч уулзаж болох юм.

Мормончуудын Есүс

Хэрэв мормон хүн таны хаалгыг тогшвол тэр танд Лусиферын сүнсний ах Есүсийг танилцуулах болно. Мормончуудын Есүс нь тэдний “Тэнгэрлэг Эцэг” болон “Тэнгэрлэг Эх”-ийн нэгдлээс энэ орчлонд авчирсан олон тэрбум сүнсний нялх хүүхдүүдийнх нь нэг юм. Мормончуудын хэлснээр, Есүс дэлхий дээр амьдарч байхдаа хэд хэдэн эхнэртэй байсан бөгөөд тэдний нэг нь Магдалын Мариа байв. Тэрээр нас барж, амилсныхаа дараа Америкт очиж, уугуул америкчуудад номлосон гэж заадаг.

Еховагийн гэрчүүдийн Есүс

Еховагийн гэрчүүд Есүсийг тэргүүн тэнгэрэлч Михаел гэж үздэг бөгөөд тэрээр анхны бүтээл төдийгүй хүн болж, загалмай дээр биш, харин шон дээр үхсэн гэж заадаг. Улмаар тэр сүнслэг биет болон амилж, эргээд тэргүүн тэнгэрэлч Михаел болсон. Түүний бие нь хий болон замхарсан гэж заадаг.

Эдгээр гаж сургаалтнууд Библийн Есүсээс өөр Есүстэй гэдгийг та мэдэх болов уу гэж би найдаж байна. Гэхдээ та Библийн жинхэнэ Есүсийг тодорхойлж чадах уу? Сая сая хүмүүс өөрсдийг нь аварч чадахгүй хуурамч христийн тухай ойлголттой явдаг.

Есүсийн талаарх итгэл үнэмшилдээ баттай байх нь чухал юм. Ингэснээр та мэхлэгдэхгүй бөгөөд бусдад Түүнийг танилцуулж чадна.

Ангийн удирдагчийн тэмдэглэл: Есүсийн талаар бусад шашнууд юу гэж заадаг тухай илүү ихийг мэдэхийг хүсвэл хичээлийн төгсгөлд буй “Бусад шашин юу хэлдэг вэ” хэсгийг үзнэ үү.

Есүс бол Мессиа

► Мессиагийн талаар Библид юу гэж урьдаас хэлэгдсэн байдаг вэ?

Сайнмэдээний дөрвөн номд Есүсийг Израилын хүсэн хүлээсэн Мессиа хэмээн танилцуулдаг. Мессиагийн талаарх хэд хэдэн зүйлийг урьдаас өгүүлсэн байдаг. Тэрээр Давид хааны удмын хүн байсан тул хаан байх шалгуурт тэнцэнэ. Тэр ард олноо дарлал, боолчлолоос аварна. Тэрбээр ирсэн зорилгоо биелүүлэхийн тулд Бурханаар тусгайлан тослогдох болно. Мессиа гэдэг нь “тослогдсон нэгэн” гэсэн утгатай бөгөөд Израилын хаадын нэр өргөмжлөл байжээ.

Хуучин гэрээнд гардаг Мессиагийн талаарх хамгийн чухал нарийн ширийн зүйлсийг Шинэ гэрээ бичигдэх хүртэл тодорхой тайлбарлаагүй юм. Түүний нэн тэргүүний зорилго бол ард түмнээ нүглээс нь чөлөөлөх байв (Матай 1:21; Лук 1:74-75, унших). Түүний хаанчлал нь газар дэлхийнх бус, харин сүнслэг бөгөөд тэнгэрийнх (Иохан 18:36, унших) боловч эцэст нь Түүний хаанчлал газар дэлхийг ч бүхэлд нь хамарна (Филиппой 2:10-11; Илчлэл 19:11-16; Илчлэл 20:6).

Мессиа нь еврей үг бөгөөд үүнтэй ижил утгатай грек үг нь Христос бөгөөд үүнээс Христ гэдэг үг үүсэлтэй. “Есүс Христ” гэсэн хэллэг нь Есүс бол Мессиа гэсэн утгатай нэр юм.

Есүс бол Эзэн

Эртний чуулган, хүн захирагдах ёстой хамгийн дээд эрх мэдэлтэй нэгэн бол Есүс гэж хэлэхийн тулд Эзэн гэсэн нэр томъёог ашиглажээ. Тэд “Есүс бол Эзэн” гэж хэлэхдээ Тэр бол бүхний Эзэн, орчлон ертөнцийг Бүтээгч ба Бурхан мөн гэсэн санааг илэрхийлдэг байжээ. Энэхүү итгэлийн тунхаг нь Христэд итгэгчдийг ялгаж байсан. Учир нь Христэд итгэгчид л газар дэлхий дээр алхаж байсан хүмүүн Есүсийг бүхнээс дээгүүр нэг Бурхан гэдэгт итгэдэг байв.

“Эзэн Есүс Христ” гэдэг үг агуу тунхаглалыг илэрхийлдэг. Эдгээр нь Есүс бол Мессиа бөгөөд тэрхүү Есүс нь мөн Бурхан гэж хэлдэг. Энэхүү гурван үг Филиппой 2:10-11-д тэмдэглэгджээ. Эдгээр эшлэл бидэнд дэлхий ертөнц дээрх бүх хүн Есүс Христ бол Эзэн гэж хүлээн зөвшөөрөх цаг ирнэ гэдгийг хэлдэг.

Гурван онцгой өдөр

Есүсийн талаарх бидний үндсэн итгэл үнэмшлийг гурван онцгой өдөртэй холбож, гурав ангилах боломжтой.

Христийн мэндэлсэн өдөр нь Есүс онгон эмэгтэйгээс төрснийг онцлон тэмдэглэдэг. Учир нь Есүс Ариун Сүнсээр эхийн хэвлийд бүрэлдсэн юм (Лук 1:34-35, унших). Хэдийгээр Есүс эмэгтэй хүнээс төрснийхөө хувьд хүн боловч Тэр мөн Өөрийн бүтээсэн дэлхий ертөнцдөө орж ирсэн Бүтээгч, Бурхан байсан юм. Есүсийг нялх байхад ээж Мариа нь өөрийг нь бүтээсэн Нэгэнийг тэвэрчээ. Энэ нь үнэхээр гайхалтай төдийгүй үнэн билээ.

Бурханы хөвгүүд гэсэн хэллэгээр итгэгчид болон тэнгэрэлч нарыг нэрлэдэг (Иохан 1:12; Иов 1:6) бол харин Есүс үүнээс маш онцгой тул Бурханы хүү юм (Иохан 3:16). Тэр Эцэгийн мөн чанарыг бүрэн хуваалцдаг цорын ганц Нэгэн. Тэрээр бүрэн дүүрэн Эцэгийн дүр төрх бөгөөд Эцэг шигээ Бурхан билээ (Еврей 1:2-3, унших).

Бурханы мөн чанар ба хүмүүн мөн чанар хамтдаа бодгаль Есүст нэгджээ. Үүнийг биежилт гэж нэрлэдэг. Энэ нь Бурхан хүний биеийг авч, хүн болсон гэсэн үг юм. Есүс орчлон ертөнц дээрх цорын ганц Бурхан-хүн учраас Тэр биднийг аварч чадах цорын ганц Нэгэн билээ.

Есүс бол Хүн

Шинэ гэрээний Есүсийг жинхэнэ хүн байсныг таних нь тийм ч хэцүү биш. Тэрээр эхийн хэвлийд бүрэлдэж, өсөж торнин, суралцаж, хүн болж төлөвшсөн (Лук 2:52, унших). Тэр ядарч, унтаж, соригдож үзсэн бөгөөд нүглээс бусад хүмүүсийн хийдэг бараг бүх зүйлийг хийсэн (Еврей 4:14-15). Тэр үхлийг хүртэл амссан. Тэрбээр бидний нэг болсноороо хүн төрөлхтөнтэй ижилссэн юм (Иохан 1:14, унших).

► Есүс хүн гэдгийг мэдэх нь бидний хувьд яагаад чухал вэ?

Есүс хүн учраас:

1. Тэр золиос болж зовж, үхэж чадах байв (Ефес 5:2, Еврей 7:26-27). Хэрэв Тэр хүн биш Бурхан байсан бол бие махбодын хувьд зовж шаналах, үхэх боломжгүй байсан.

2. Түүний зөвт байдал биднийг зөвт болгож, амийг өгч чадна. Бүх хүн төрөлхтнийг төлөөлсөн анхны хүн Адам нүгэл үйлдэж, Бурханаас тусгаарлагдсан. Энэ нь бүх хүмүүст үхлийг авчирсан юм. Есүс нүгэлгүй амьдарч, Бурханы бүх шаардлагыг биелүүлэв. Өөртэйгөө нэгдсэн бүх хүнд Тэр мөнх амийг өгдөг. Түүнийг Бичвэрт сүүлчийн Адам гэж нэрлэсэн байдаг (1 Коринт 15:22, 45-49; Ром 5:17-19).

3. Тэр биднийг Бурханы өмнө төлөөлөх тахилч байж чадна. Биднийг зуучлагчийн хувьд Тэр зөвхөн бидний төлөө харилцаад зогсохгүй, биднийг жинхэнээсээ төлөөлдөг. Биднийг Бурхантай эвлэрүүлэхийн тулд Тэр хүн байх ёстой болжээ (Еврей 2:17, унших). Түүний тахилчийн үүрэг нь мөнхийн авралыг өгдөг (Еврей 5:9, Еврей 10:5-7). Есүсийн хүмүүн мөн чанар нь сайнмэдээний чухал хэсэг юм (1 Иохан 5:1, унших).

Ангийн удирдагчийн тэмдэглэл: Есүс хүн байсан талаарх Библийн баримтуудыг энэ хичээлийн төгсгөлд буй “Есүсийн хүмүүн чанарын талаарх Бичвэрийн нотолгоо” хэсгээс үзнэ үү.

Есүс бол Бурхан

Есүс Өөрийгөө Бурхан гэж хэлсэн.

Библийн Есүс нь хүн боловч зөвхөн хүн биш юм. Тэрээр мөн орчлон ертөнцийн цорын ганц хязгааргүй (хэмжээлшгүй) Бурхан билээ. Есүс Өөрийнхөө талаар тийнхүү хэлсэн байдаг. Тэрээр “Би болон Эцэг нэг юм” (Иохан 10:30) гэж хэлсэн. Түүнийг ингэж хэлэх үед иудейчүүд Тэр Өөрийгөө Бурхантай адил тэнцүү гэж хэллээ гэж ойлгосон тул Түүн уруу чулуу шидэцгээжээ. Харин Есүс тэдэнд “Үгүй, та нар намайг буруу ойлгож байна, Би үнэхээр Бурхан биш гэж” хариулсан уу? Үгүй. Есүс тэдний тайлбарыг хүлээн зөвшөөрсөн байдаг. Тэр Өөрийгөө Бурхан Эцэгтэй адил тэнцүү гэж заасан юм.

Есүс “Абрахамаас өмнө ч Би байгаа” (Иохан 8:58) гэж хэлэхдээ Өөрийгөө бие даан Өөрөөрөө оршдог орчлон ертөнцийн Бурхан Гэтлэл 3:14 дэх “Би байгаа” юм гэж зарласан. Түүний энэхүү мэдэгдлийн төлөө иудейчүүд дахин чулуу шидэхээр оролджээ (Иохан 8:59).

Есүс газар дэлхий дээр тэнгэрлэг үйлсийг гүйцэтгэжээ

Есүс газар дэлхий дээр байхдаа тэнгэрлэг үйлсийг гүйцэтгэжээ. Тэр мөнхийн амьдралыг өгч (Иохан 10:28, унших), нүглүүдийг уучилсан (Марк 2:10). Эдгээр нь зөвхөн Бурханы хийж чадах зүйл юм.

Есүс саа өвчтэй хүнийг эдгээж, нүглийг нь уучилснаар газар дээр нүглүүдийг уучлах эрхтэй (Марк 2:5, 10-12) гэдгээ нотолсон. Нэг үйлдэл нөгөө үйлдлийнхээ нотолгоо болж байсан нь Есүс Бурханаар тослогдсон жирийн нэг эш үзүүлэгчийн хувьд эдгээх гайхамшгийг үйлдээгүй болохыг харуулдаг. Есүст эдгээх болон уучлах тэнгэрлэг эрх мэдэл ба хүч байсан.

Есүс мөн “Амилал ба амь бол Би байгаа юм” (Иохан 11:25) гэж хэлснийхээ дараа Лазарыг амилуулсан юм. Энэ нь мөн л Бурхан гэдгийг нь харуулж байгаа бурханлаг үйлс байв. Зөвхөн Бурханы хүч л хүн бүрийг үхэгсдээс амилуулж чадах учраас зөвхөн Бурхан л Өөрийгөө амилал гэж хэлж чадна. Есүс Өөрийгөө Амь өгөгч гэж зарлаад дараа нь Лазарт амийг өгсөн нь Өөрийгөө хэн болохыг харуулж буй үйлдэл юм. Энэхүү үйл явдлаар Есүс Өөрийгөө бусад эш үзүүлэгчид болон Бурханы хүчээр хүмүүсийг үхэгсдээс амилуулсан элч нараас тодорхой ялгаж чадсан. Тэдний хэн нь ч өөрсдийгөө гайхамшгуудыг үйлдэх эрх мэдэлтэй гэж мэдэгдэж байгаагүй юм. Тэд зүгээр л Бурханы зэмсэг байв. Иохан 5:21-д Есүс, Эцэг үхэгсдийг амилуулдаг шиг Хүү ч бас амилуулдаг гэж хэлсэн.

Есүс гайхамшгуудаа үйлдэхдээ Өөрийн алдрыг илчилсэн (Иохан 2:11). Энэ нь Эцэгээс ирсэн цорын ганц Хүүгийн алдар бөгөөд нигүүлсэл, үнэнээр дүүрэн байв (Иохан 1:14). Эдгээр гайхамшгууд нь Бурханы Хүүгийн сүр жавхлант хүчийг харуулж, Тэр Бурхан гэдгийг баталжээ.

Есүс бол Бүтээгч бөгөөд Тэтгэгч.

Элч Иохан болон Паулын хэлснээр, Есүс бүх зүйлийг бүтээж, бүх зүйлийг хамтад нь байлгадаг бөгөөд бүх зүйл Түүний төлөө оршин байгаа юм (Иохан 1:3; Колоссай 1:17, унших). Үүнийг Бурханаас өөр хэн ч хэлж чадахгүй нь тодорхой.

► Есүс Бурхан гэдгийг мэдэх нь бидний хувьд яагаад чухал вэ?

Есүс Бурхан учраас,

1. Түүний золиос бүхий үхэл нь хязгааргүй үнэ цэнтэй бөгөөд дэлхийн нүглийг уучлахад хангалттай юм (1 Иохан 2:2).

2. Түүнд биднийг аврах хүч бий; Тэр бол зам, үнэн, амь мөн (Иохан 14:6).

3. Бид Эцэгийг мөргөн хүндэтгэдэг шигээ Түүнийг мөргөн хүндэтгэх ёстой (Иохан 5:23, унших).

Хэрэв бид Есүсийг Бурхан гэж харж чадахгүй бол Түүнийг Бурхан гэж хүндлэхгүй. Хэрэв бид Эцэг ба Хүүг хоёуланг нь Бурхан гэж хүндлэхгүй бол аврагдах боломжгүй.

Христитгэл нь зөвхөн Есүсийн сургаал ба үйлсээс гадна онцгой бодгаль Есүс дээр суурилдаг. Тэр зөвхөн авралын мэдээг дамжуулдаг багш биш юм. Тэр Өөрөө Аврагч, зөвхөн Тэр Бурхан-хүн бөгөөд Аврагч байж чадах байв.

Ангийн удирдагчийн тэмдэглэл: Есүс Бурхан гэдгийн Библийн баримтуудыг энэ хичээлийн төгсгөлд буй “Есүсийн Бурхан чанарын талаарх Бичвэрийн нотолгоо” хэсгээс үзнэ үү.

Есүс бол нэг бодгаль

Хэдийгээр Есүст Бурханы бүх мөн чанар болон хүний бүх мөн чанар байдаг ч Тэр хоёр бодгалийн нэгдэл биш юм. Хоёр мөн чанар нь Түүний дотор нэг бодгальд төгс зохицдог. Есүс бол цорын ганц Бурхан-хүн бөгөөд үйлс бүрийг нь Түүний бүрэн дүүрэн хүн, бүрэн дүүрэн Бурхан чанарынх нь үүднээс ойлгох ёстой юм. Чуулган Есүсийн доторх хоёр мөн чанарыг бие биенээс нь салгаж болохгүй гэж үргэлж сургасаар ирсэн хэдий ч тэдгээр нь мөн чанараа алдах хэмжээнд хоорондоо холилддоггүй.[1]

Есүсийн мөн чанарыг Ариун Бичвэрийн мөн чанартай харьцуулах нь тустай байж болох юм. Есүсийн адил, Библи нь бүрэн тэнгэрлэг мөн бүрэн хүний ном билээ. Хүний ном болохын хувьд энэ нь бусад номуудтай адил шинж чанарыг агуулдаг ч ямар ч алдаа мадаггүй гэдгээрээ онцлогтой. Харин тэнгэрлэг ном болохын хувьд өөр ямар ч номд байдаггүй тийм шинж чанаруудыг өөртөө агуулдаг. Үүнтэй адил, Есүс хүний болон Бурханы чанарыг хоёуланг харуулдаг. Библи нь тэнгэрлэг шинж чанарыг агуулдаг учраас бусад номуудаас доогуур гэж бид үздэггүй. Үүний нэгэн адил, Есүс Өөрийн Бурхан чанарын хүрээнд үйлдэх нь Түүнийг хүмүүн бус болгохгүй. Түүнчлэн Есүс хүмүүн чанараараа үйлдэх нь Түүнийг Бурхан бус болгодоггүй.

Онол сургаалын нийтлэг алдаанууд

Хүмүүс Христийн талаар ярихдаа гаргадаг онол сургаалын нийтлэг алдаанууд нь:

• Есүс Бурхан гэдгийг үгүйсгэх

• Есүс хүн гэдгийг үгүйсгэх

• Түүний хүмүүн болон Бурхан чанарын аль нэгийг багасгаж, чухал биш гэж үзэх

• Христийн бодгалийн нэгдмэл байдлыг үгүйсгэх

Дээрх алдаанууд бүгд Түүний биежилтийг үгүйсгэж байгаа юм. Биежилт нь бидний авралд зайлшгүй шаардлагатай байсан бөгөөд хэрэв хүн биежилтийг үгүйсгэвэл тэрээр худал сайнмэдээ, хуурамч авралд итгэхээс өөр замгүй болно.

Ангийн удирдагчийн тэмдэглэл: Ангийн нэг гишүүн энэ хэсгийг тайлбарлана уу.

Еховагийн гэрчүүд Есүсийг хүн байсан гэж хэлдэг. Тэд Түүнийг хэзээ нэгэн цагт амьдарч байсан хамгийн агуу хүн байсан, хүн хэвээрээ л үлдсэн гэж үздэг. Тийм ч учраас Түүний үхэл нь бидний авралын төлөөх хангалттай тахил золиос гэдэгт тэд итгэдэггүй. Тэд үйлсээр аврагдах сайнмэдээнд итгэдэг. Тэд өөрсдийгөө Христэд итгэгч гэж ярьдаг ч тэд өөр шашинтай.

Мормончууд Есүсийг Лусиферын ах мэтээр анх Бурханаар бүтээгдэхдээ сүнс байсан гэж итгэдэг. Тэр түүнийг Есүс гэдэг хүн болгон дэлхийд илгээсэн гэж үздэг. Мормончууд Есүсийг Бурхан гэдэгт итгэдэггүй.

Муслимчууд Есүсийг Бурханаас илгээгдсэн эш үзүүлэгч байсан гэж итгэдэг. Тэд Түүнийг Бурхан, Гурвал гэдэгт итгэдэггүй. Тэд Түүнийг загалмайд цовдлогдсон эсвэл үхэгсдээс амилсан гэдэгт итгэдэггүй.

Хиндү болон Буддын шашинтнууд Есүсийг гайхамшгуудыг үйлдэж байсан ариун хүн гэж итгэдэг. Тэр тэдний шашинд тийм ч чухал биш. Тэд Бүтээгч, Эзэн Бурхан байдагт итгэдэггүй учраас Есүсийг биежсэн Бурхан гэдэгт итгэдэггүй.

Сайн Баасан гараг нь Есүсийг цовдолсон өдөр юм. Энэ аймшигтай бөгөөд гайхалтай өдөр Есүс бидний нүглийг загалмайд үүрсэн билээ. Тэр бидний нүглийн төлөөх золиос болж үхсэн бөгөөд ингэснээр бид уучлагдсан юм.

Тахил золиос шаардлагатай байсан

Бурхан биднийг уучилж, биднийг зөвт, ариун байлгахын тулд тахил золиос шаардлагатай байсан юм. Энэхүү зарчмыг Хуучин гэрээнд Бурханы шаарддаг байсан тахилаар дамжуулан заасан юм (Еврей 9:22). Хэрэв Тэр нүглийг үндэслэлгүйгээр зүгээр л уучилсан бол энэ нь Бурхан шударга бус, нүгэл тийм ч ноцтой биш гэдгийг илтгэх байсан. Гэвч хэн ч Есүсийн загалмайд цовдлогдсон үхлийг харахдаа нүгэл нь ноцтой биш гэж хэлж чадахгүй юм. Түүний золиос бидний өршөөгдөх үндэс болсон.

Зөвхөн Есүс л хангалттай тахил золиос байж чадна

► Яагаад зөвхөн Есүс л нүглийн төлөөх тахил золиос байж чадах вэ?

Бурханы шударга ёс, нүглийн ноцтой байдал нь өөр ямар ч бүтээгдсэн зүйлсээс илүү их тахил золиосыг шаарддаг (Еврей 10:4, унших). Бид хязгааргүй Бурханы эсрэг нүгэл үйлдсэн бөгөөд энэ нь бидэнд хязгааргүй гэм бурууг авчирдаг. Тийм учраас зөвхөн Есүс л тахил золиос болж чадах байлаа. Тэр Бурхан бас хүн учраас шаардлагыг хангасан юм. Бурхан чанарынхаа улмаас Тэр нүгэлгүй байсан бөгөөд Түүний тахил золиос нь хязгааргүй үнэ цэнтэй байв. Хүмүүн чанарынхаа улмаас Тэр биднийг төлөөлж, бидний оронд үхэх боломжтой болсон юм.

Есүсийн цус Түүний золиос бүхий үхлийг төлөөлдөг

Тахил өргөх замаар эвлэрүүлэл хийгдэхийг Бурхан хүмүүст заасан байв. Тахилч нар амьтдыг алж, тэдний үхлийг төлөөлөх цусыг нь өргөдөг байжээ. Еврей номд цус урсахгүйгээр уучлал үгүй (Еврей 9:18-22) гэж бичигдсэн юм.

Цус нь амьтны амийг төлөөлдөг тул цустай онцгой байдлаар харьцахыг Бурхан хүмүүст тушаасан байдаг (Леви 17:11, 14). Цус урсгах нь алах гэсэн утгатай (Эхлэл 9:5-6). Сүмд цусыг хэрэглэсэн гэдэг нь амьтны амь үрэгдсэн гэсэн үг юм.

Христийн үхэл нь бүх цаг үеийн, бүх хүмүүсийн авралыг боломжтой болгосон эцсийн тахил золиос байв (Еврей 10:4, 12, унших). Тэнгэрт өргөгдсөн Түүний цус золиос бүхий Түүний үхлийг төлөөлдөг (Еврей 9:12, 24, унших). Түүний үхлийг төлөөлдөг Түүний цус биднийг авралд хүргэдэг. Тэрээр тахил золиос болж үхсэн учраас л бид аврагдах боломжтой болсон.

Есүс яагаад өөр аргаар биш, загалмай дээр үхэх болсон юм бэ? Хуучин гэрээний цаг үед хүнийг модонд дүүжлэх нь Бурханы хараалын шинж тэмдэг байжээ (Дэд хууль 21:23). Элч Паул, Есүс модон дээр цовдлогдсоноор Бурханы хараалыг Өөр дээрээ авсан юм гэж хэлсэн байдаг (Галат 3:13).

Есүс, хүн Бурхан хоёрыг нэгдүүлсэн

Есүс, хүн ба Бурхан гэсэн хоёр тусгаарлагдсан талуудыг эвлэрүүлэхээр иржээ. Зуучлагчийн хувьд Есүс хоёр талыг нэгэн зэрэг төлөөлөх ёстой байв. Бурханы хувьд Тэрээр Бурханыг хүмүүст төлөөлсөн бол хүний хувьд Тэр хүнийг Бурханы өмнө төлөөлжээ. Хоёр талыг бүрэн төлөөлснөөр Есүс хүн ба Бурханыг нэгдүүлсэн. Эвлэрэхийн тулд хоёр талын хийх ёстой зүйлийг Тэр хийжээ.

Христийн амилсан өдрийг тэмдэглэх олон уламжлалт аргууд байдаг ч маш олон хүн хийж буй зүйлийнхээ утга учрыг ойлгохгүйгээр тэмдэглэдэг. Магадгүй тэд Есүсийн амиллын талаар юу нь чухал болохыг мэддэггүй байж болох юм. Есүс цовдлогдсоныхоо дараа гурав дахь өдөр буюу амилуулагдсан өдрийнхөө өглөө булшнаас босжээ. Үүгээрээ Тэр нүгэл, үхэл, чөтгөрийг ялан дийлэх хүчтэй гэдгээ харуулсан юм. Тэр бидний үхлийг аваад зогсохгүй, амийг өгч ялан дийлсэн. Тэр ялалт байгуулсан учраас бид ч бас ялан дийлэх болно!

Есүс биеэр амилсан

Есүс нэг удаа иудейчүүдэд хандан “Энэ сүмийг нураа. Би үүнийг гурван өдрийн дотор босгоно” хэмээн хэлж байсан. Хэдийгээр иудейчүүд Түүнийг Херодын барьсан сүмийн талаар хэлж байна гэж бодсон ч Иоханы Сайнмэдээнд Есүс үнэн хэрэгтээ Өөрийн биеийн талаар өгүүлсэн болохыг тайлбарласан байдаг (Иохан 2:19-21). Сайнмэдээний бүх номд Есүсийг оршуулснаас хойш гурван хоногийн дараа Түүний булш хоосон байсан тухай тэмдэглэжээ. Есүс амилсныхаа дараа дагалдагч нартаа Өөрийгөө харуулж, “Надад гараа хүргээд үз. Учир нь сүнсэнд та нарын харж байгаа Над шиг яс, мах байдаггүй юм” (Лук 24:39) гэж хэлсэн. Тэрээр бие махбодоороо үхлээс амилсан гэдгээ батлан өгүүлжээ.

► Хэрэв Есүс үхлээс амилаагүй бол ямар ялгаа байх байсан бэ?

1. Есүс биеэр амилсан нь Тэр нүгэл ба үхлийг бүрэн ялсан гэдгийг харуулсан (Колоссай 2:12-15; Илчлэл 1:17-18, унших).

2. Есүс биеэр амилсан нь Тэр Өөрийнхөө талаар юу гэж хэлж байсныг баталсан (Матай 17:22-23, Иохан 2:16-22). Тиймээс энэ нь сайнмэдээг ч мөн нотолсон. Есүсийг үхлээс амилсан гэдгийг үгүйсгэдэг хүмүүс сайнмэдээг ч мөн үгүйсгэдэг (1 Коринт 15:17, унших).

3. Есүсийн амилал нь бид ч мөн үхлээс амилуулагдана гэдгийг баталдаг. Есүс үхэгсдийг амилуулна гэж амласан юм. Хэрэв Тэр Өөрөө босож ирээгүй бол энэ амлалт нь итгэхийн аргагүй байх байсан (Иохан 5:28-29). Бид Есүсийн алдаршуулагдсан биетэй адил биетэй байхаар амилуулагдах болно (1 Иохан 3:2, унших).

Есүс хүн хэвээрээ

Амилал нь Христийн биежилт өөрчлөгдөшгүй гэдгийг бидэнд харуулдаг. Есүс үргэлж хүн хэвээрээ мөн Бурхан хэвээр байх болно. Есүс Бурхан-хүн хэвээрээ байгаа бөгөөд Тэр одоо ч Эцэгт хандан бидний төлөө зуучлан залбирдаг (Ром 8:34). Тэрээр хэзээ нэгэн цагт биднийг тэнгэрийн улсад аваачихаар эргэн ирэх болно (1 Тесалоник 4:16-17).

Итгэгчид бид өдөр бүр Христтэй харилцаж амьдардаг. Тэр зөвхөн түүхэнд байсан хүн төдий биш, зөвхөн тэнгэрт байдаг Бурхан ч биш, харин бидэнтэй хамт байдаг Нэгэн. Тэрээр дагалдагч нартайгаа үргэлж хамт байхаа амласан (Матай 28:20).

Тэр онцгой байдлаар чуулганд оршдог. Тэрээр чуулганы Тэргүүн бөгөөд чуулганыг Түүний Бие гэж нэрлэдэг (Ефес 1:22-23). Тэрбээр чуулганыг удирдан чиглүүлж, хамтад нь тогтоон барьж, хангаж байдаг (Колоссай 2:19, унших).

Есүсийн тухай үнэнийг хүлээн авдаг хүн итгэл, дуулгавартай байдлаар хариу үйлдэх ёстой. Та бусдыг итгэгч болоход нь тусалж, дараах байдлаар дагуулан залбирч болно.

Аав аа, Та Өөрийн Хүү Есүсийг миний төлөө дэлхийд илгээж, намайг ийм ихээр хайрласанд баярлалаа. Есүс нүгэлгүй амьдарсан, Бурхан-хүн бөгөөд миний нүглүүдийг уучлахын тулд, Тантай харилцах харилцааг минь сэргээхийн төлөө нас барж, амилсан гэдэгт би итгэж байна. Би үйлдсэн бүх нүгэлдээ маш их харамсаж байна. Миний нүгэл Есүсийг загалмайд хадсан гэдгийг би мэдлээ. Яг одоо би буруу гэж мэдсэн бүх зүйлээсээ татгалзаж, Есүсийг Эзэн, Аврагч гэж хүлээн авч байна. Энэ өдрөөс намайг удирдаач. Би Таны төлөө үүрд амьдрах болно! Намайг уучилсанд баярлалаа. Би Танд хайртай. Амен.

► Итгэлээ шалгах хэсгийг хамгийн багадаа хоёр удаа хамтдаа уншаарай.

Есүс нь Мессиа бөгөөд бүхний Эзэн, онгон эмэгтэйгээс төрсөн Бурханы Хүү, нэг бодгаль дотор хүмүүний бүх мөн чанар ба Бурханы бүх мөн чанарыг агуулдаг. Тэрээр нүгэлгүй амьдралаар амьдарч, бидний нүглийг уучлахын тулд золиос болон үхсэн. Тэр үхлээс амилуулагдсан бөгөөд буцаж ирэхдээ бүх итгэгчдийг амилуулах болно. Түүний хаанчлал нь бүх орчлон ертөнцийг хамарсан бөгөөд төгсгөл үгүй юм.

Ангийн удирдагчийн тэмдэглэл: Энэ хэсэг болон дараагийн хэсгийг сонгож суралцах боломжтой. Хэрэв ангийнхан эдгээр зүйлийн талаар Библийн нотолгоо авахыг хүсвэл тэдгээрийг нэмэлтээр үзэж болно.

Есүс Евагийн үр удам (Эхлэл 3:15), Абрахамын үр (Эхлэл 22:18-ыг Үйлс 3:25-тай харьцуул), эмэгтэйгээс төрсөн (Галат 4:4), Мариагаас төрсөн (Матай 1:21-25), Хүний Хүү гэж нэрлэгддэг (Матай 13:37) бөгөөд хүний өсөлт төлөвшилтийн ердийн үйл явцыг туулсан (Лук 2:40, 52).

Түүнийг төрөлх хотдоо эргэн ирэх үеийн хүмүүсийн хариу үйлдэл нь Түүний бага нас хэвийн байсныг харуулдаг (Матай 13:54-56).

Тэр хүний ёсыг дагахын тулд бие махбодтой байв (Еврей 10:5-9); Тэр мах цус болсон (Еврей 2:14); Тэр бидэнтэй адил зовж шаналахын тулд бидний адил бүтээгдсэн (Еврей 2:10-18); Тэрээр зовлонгоор дамжин төгс болгогдсон (Еврей 2:9-10); Мөн Тэрбээр хүнд тохиолддог сорилтуудыг ч туулсан (Еврей 4:15).

Тэр хүн төрхийг олсон (Филиппой 2:6-8).

Тэрээр Бурханы мөнхийн Үг байсан бөгөөд махбод болж, газар дэлхий дээр амьдарсан (Иохан 1:14).

Христитгэлийн чухал сургаал нь Есүсийн хүмүүн мөн чанар юм (Иохан 1:14; 1 Иохан 4:2-3).

Есүсийг Бурхан гэдгийг батлах гурван арга зам:

1. Түүнийг Бурхан гэж нэрлэдэг.

2. Тэр Бурханы шинж чанаруудыг харуулсан.

3. Тэр Бурханы үүрэг оролцоог харуулсан.

Есүсийг Бурхан гэж нэрлэдэг

• Иохан 1:1, 14-д Мөнхийн Үг нь Бурхан байсан гэж хэлжээ.

• Иохан 12:41-д Исаиа Есүсийг харсан гэж бидэнд хэлсэн.

• Үйлс 20:28-д Тэр Бурханы чуулганыг Өөрийнхөө цусаар худалдан авсан гэж айлдсан.

• Ром 9:5-д Христ ирсэн бөгөөд Тэр бол үүрд мөнхөд магтагдах Бурхан мөн хэмээжээ.

• Тит 2:13-д Түүнийг Бурхан ба Аврагч Есүс Христ гэж хэлсэн.

• Матай 1:23-д (Исаиа 7:14-өөс эш татсан) Түүний нэрийн утгыг “Бурхан бидэнтэй хамт” гэжээ.

• Исаиа 9:6-д Түүнийг Хүчит Бурхан гэж дуудах талаар өгүүлсэн.

• 1 Тимот 3:16-д Бурхан махбодоор илчлэгдсэн, үндэстнүүдийн дунд тунхаглагдсан, сүр алдраар дээш авагдсан гэжээ.

• Иохан 10:30, 33-д Би болон Эцэг нэг юм гэж Есүс хэлсэн байдаг.

• Иохан 5:17-18-д Есүс Өөрийгөө Бурхантай адилтгасныг иудейчүүд мэдэж байсан.

• Иохан 14:9-д “Намайг харсан нь Эцэгийг харсан” гэж Есүс хэлсэн.

• Иохан 20:28-29-д Томас Түүний сорви, ормыг харахдаа “Эзэн минь, Бурхан минь” гэхэд Есүс итгэсэн нь ерөөлтэй еэ гэж айлдсан.

• Иохан 8:58-д Тэр Өөрийгөө “Би байгаа” гэж хэлэхэд Тэр Өөрийгөө Бурхан гэж хэллээ гэдгийг иудейчүүд мэдэж байсан.

• Илчлэл 1:17, Илчлэл 2:8, болон Илчлэл 22:13-д Тэр Өөрийгөө Эхэн ба Эцэс гэж хэлсэн бол Исаиа 44:6-д энэ хэллэг нь Бурханд хамаатай байдлаар бичигдсэн.

• Еврей 1:2-3-д Тэр бол Эцэгийн бүрэн дүүрэн дүр төрх гэдгийг бидэнд хэлсэн.

• Еврей 1:8-д Хүүг Бурхан хэмээн хандан хэлсэн.

Есүст Бурханы шинж чанарууд бий

Хаа сайгүй оршдог. Матай 18:20-д хоёр эсвэл гурван итгэгч хамт цуглавал Есүс тэдний дунд байна гэж хэлсэн бол Матай 28:20-д итгэгчидтэй үргэлж хамт байна гэж Тэр амласан.

Бүгдийг чаддаг. Еврей 1:3-д Тэр бүх зүйлийг Өөрийн хүчээр барьж байдаг гэж хэлсэн. Филиппой 3:21-д Тэр бүх юмсыг Өөртөө захируулдаг гэж бичигдсэн.

Мөнхийн. Еврей 13:8-д Тэр мөнхөд хэвээрээ гэж хэлэгдсэн бол Еврей 1:12-д Түүнийг үүрд хэвээрээ гэж хэлсэн. Энэ эшлэлийг Дуулал 102:25-27-оос эш татсан бөгөөд энэ нь Бурханы талаар өгүүлдэг.

Бүхнийг мэддэг. Иохан 2:24-25-д Тэр бүх хүмүүсийг мэддэг бөгөөд тэдний зүрх сэтгэлд юу байгааг ч мэддэг тухай өгүүлсэн. Иохан 10:15-д Эцэг Түүнийг мэддэг шиг Тэр Эцэгийг мэддэг гэж хэлсэн байдаг.

Есүст Бурханы үүрэг оролцоо бий

• Есүс бол Бүтээгч (Колоссай 1:16; Еврей 1:10).

• Есүс нүглийг уучилсан (Лук 5:20-24, Лук 7:48).

• Эцсийн шүүлтэд Есүс шүүх болно (Матай 25:31-46; 2 Коринт 5:10).

• Эцэгийн адил Есүс мөргөл хүндэтгэлийг хүлээн авсан (Иохан 5:22-23; Еврей 1:6; Илчлэл 5:12-13).

(1) Эшлэл унших: Суралцагч тус бүр дараах эшлэлүүдээс нэгийг сонгоно. Дараагийн хичээл эхлэхээс өмнө эшлэлийг уншиж, энэхүү хичээлийн сэдвийн талаар тус эшлэлд юу гэж хэлснийг багцлан бичнэ.

• Марк 1:1-12

• Иохан 5:19-26

• Иохан 6:44-51

• Иохан 8:51-59

• Үйлс 2:22-36

• Илчлэл 1:12-18

(2) Сорил: Дараагийн хичээлийг 7-р хичээлийн сорилоор эхэлнэ. Сорилд бэлтгэж, асуултыг сайн судлаарай.

(3) Бусдад заах: Ангиас гадуур заах хуваарь гаргаж, тайлагнахаа мартуузай.

(1) Мессиагийн нэн тэргүүний зорилго юу байсан бэ?

(2) Эртний чуулган “Есүс бол Эзэн” гэж хэлэхдээ ямар санааг илэрхийлдэг байсан бэ?

(3) Есүс ямар байдлаараа Бурханы онцгой Хүү нь вэ?

(4) Биежилт гэж юу вэ?

(5) Есүс хүн гэдгийг мэдэх гурван чухал шалтгааныг жагсаана уу.

(6) Есүс Бурхан гэдгийг мэдэх гурван чухал шалтгааныг жагсаана уу.

(7) Тахил золиос шаардлагатай байсан хоёр шалтгаан юу вэ?

(8) Есүс яагаад өөр аргаар биш, загалмай дээр үхэх болсон бэ?

(9) Есүс биеэр амилсан ач холбогдлын талаарх гурван шалтгааныг жагсаана уу.