(1) Суралцагч нь дараах санаануудыг тайлбарлаж чаддаг болсон байна. Үүнд:

• Нүглийн гарал үүсэл.

• Нүглийг Библид хэрхэн тодорхойлсон талаар.

• Удамшсан завхралын тодорхойлолт болон тайлбар.

• Санаатайгаар үйлдэх нүглийн талаарх Библийн ойлголт.

• Нүглийн талаарх христэч итгэл үнэмшил.

(2) Суралцагч нь санаатай үйлдэх нүгэл юу болохыг тодорхойлсноор итгэлд ирэх талаар илүү ойлголттой болно.

► Эхлэл 3-р бүлгийг хамтдаа унших. Энэхүү багц эшлэлд нүглийн талаар юуг өгүүлсэн бэ?

► Бид яагаад нүглийн талаар ойлгож мэдэх шаардлагатай вэ?

Бид нүглийг ойлгох ёстой. Ингэснээр:

1. Дэлхий ертөнцийн нөхцөл байдлыг ойлгоно. Хүний зовлонгийн шалтгааныг нүгэл гэж Библид хэлсэн. Нүглээс болж үхэл дэлхий ертөнцөд нүүрлэжээ (Ром 5:12, унших). Нүглийн үр дагавар хараалаас болж хүн өвдөж, зовж, хөгширөх болсон. Худал хэлэх, хулгай хийх, аллага, завхайр, архидан согтуурах, дарамтлах зэрэг нүглийн үйлс нь дэлхийг зовлонгоор дүүргэсэн. Нүглийн үйлс нь үзэн ядалт, тачаал, шунахайрал, бардамнал, хувиа хичээх зэрэг зүрх сэтгэл дэх нүглээс үүдэлтэй.

2. Нигүүлсэл ба авралыг ойлгоно. Бурхан биднийг нүглээс аврах нигүүлслийг өгдөг (Матай 1:21; Ром 5:20-21).

3. Ариун байдлыг ойлгоно. Нүгэлтэй байх нь ариун байдлын эсрэг юм. Энэ нь мөн Бурханд үнэнч байхын эсрэг зүйл. Хүн Бурханы хүсэж хүлээж байгаачлан ариун байхын тулд нүглээс салах ёстой (1 Петр 1:15-16).

Бурханы бүтээл төгс байсан бөгөөд Түүний бүтээсэн бүхэн өө сэвгүй байв. Бурхан бүтээлээ дуусгаад энэ нь маш сайн байсныг харжээ (Эхлэл 1:31). Тиймээс нүгэл нь Бурханы буруугаас болоогүй гэдгийг бид мэддэг.

Адам Ева хоёр Бурхантай харилцаатай байсан. Тэд Бурханыг баярлуулахыг хүсэж, зөв бүхнийг хийх чадвартай байжээ. Еваг Бурханд дуулгаваргүй байхад уруу татахаар Сатан түүн дээр ирсэн. Үүгээр бид нүгэл орчлон ертөнцөд аль хэдийн оршиж байсныг мэдэх боломжтой. Түүнчлэн Сатан аль хэдийн нүгэл үйлдсэн байв. Гэсэн хэдий ч, нүгэл нь хүн төрөлхтөнд эсвэл хүний эрх мэдэлд байсан бүтээлийн хэсэгт хараахан орж ирээгүй байсан юм.

Адам Ева хоёрт чөлөөт хүсэл байв. Тэд жинхэнэ сонголт хийх чадвартай байсан учраас нүгэл үйлдэх боломжтой байжээ. Тэд Бурханы хуулийг зөрчихийг сонгосон бөгөөд энэ нь хүний нүглийн эхлэл байсан юм.

Нүглийн анхны үйлдэл нь хүн төрөлхтнийг Бурханаас салгасан. Түүнчлэн нүгэл хүн төрөлхтний мөн чанарыг завхруулжээ (Дуулал 51:5, унших). Үүнээс хойш хүүхэд бүр ялзарсан мөн чанартай төрж, нүгэл үйлддэг болжээ (Ром 5:12, 14, 18-19, унших).

Нүгэл бүх бүтээлд хараалыг авчирсан (Эхлэл 3:16-19). Нүглийн улмаас амьдрал өөрчлөгдөж, өвдөж, хөгширч, үхдэг болсон (1 Коринт 15:22, унших). Ажиллаж, амьд үлдэх нь хүнд хэцүү болжээ. Хүний харилцаа зөрчлөөр дүүрсэн. Он жилүүд улиран өнгөрөх тусам хүмүүс үржин олширч, нүглийн үр дагавар Адам Ева хоёрын төсөөлж байснаас ч илүү ихээр олшров.

Ихэнх хэлэнд нүглийг ойролцоо утгатай өөр өөр үгээр илэрхийлдэг. Бичвэрийн эх хэл болох еврей, грек хэлэнд мөн нүглийг тодорхойлж, илэрхийлсэн ялгаатай олон үгс байдаг бөгөөд тэдгээрийг доор тайлбарлав. Эдгээр үгсийг хамтад нь авч үзвэл нүглийн талаар бүрэн дүүрэн зураглалтай болно.

• Нүгэл нь эрх мэдлээс татгалзах – эсэргүүцэл, тэрслэл юм (Дуулал 51:1). Иаков Лабанд хандан түүний эсрэг ямар гэмт үйлдэл хийснийг хэлэхийг шаардан уурсахдаа энэхүү еврей үгийг ашиглажээ (Эхлэл 31:36). Энэ үгээр мөн Моабын хаан Иехорам хааны эсрэг хийсэн үйлдлийг дүрсэлдэг (2 Хаад 3:7).

• Нүгэл нь гажуудуулах, мушгин гуйвуулах буюу — муруйлгах эсвэл ээдрээтэй болгох явдал юм (Дуулал 51:2a). Сатан юуг ч бүтээж чадахгүй бөгөөд бүх нүгэл нь Бурханы бүтээсэн сайн зүйлсийг гуйвуулсан гажуудал байдаг.

• Нүгэл нь байгаа онохгүй байх, зорилгодоо хүрэхгүй байх явдал юм. Дуулал 51:2б-д хэлэгдсэн нүгэл гэдэг еврей үг ийм утгатай. Шүүгчид 20:16-д мөн адил үгийг үсний ширхэг бүрийг алдалгүй харвах чадвартай 700 солгой дайчдыг нэлээн хэтрүүлэгтэй байдлаар дүрслэхэд ашигласан байдаг. Нүгэл нь Бурханы зөв шударга, ариун байдал болон үнэний хэмжүүрт хэзээ ч хүрдэггүй.

• Шинэ гэрээнд тэмдэглэгдсэн грек үг мөн ижил утгатай. Энэ үгээр бүх дэлхийн нүглийг (Матай 1:21) эсвэл тодорхой хүний нүглийг жишээлбэл, Есүсийн хөлийг угаасан эмэгтэйн нүгэл (Лук 7:48-50), түүнчлэн хувь хүний үйлдсэн нүглийг жишээлбэл, Стефаныг хөнөөсөн хэрэг явдал (Үйлс 7:60) зэргийг илэрхийлэхэд ашиглажээ. Нүгэл нь Бурханы хүслээс гажсан байдаг.

• Нүгэл нь муу муухай бөгөөд сайны эсрэг юм (Дуулал 51:4). Хуучин гэрээнд Фараоны зүүдэнд харагддаг долоон туранхай үхрийг (Эхлэл 41:19) болон Иеремиа 24:2-д гардаг идэж болохгүй инжрийг дүрслэхэд энэхүү еврей үгийг ашигласан байдаг.

• Нүгэл нь уналт эсвэл сонсохыг хүсэхгүй байх, улмаар байнгын дуулгаваргүй байдалд хүргэдэг (Ром 5:19). Ийм үйлдлийн жишээг Үйлс 7:57-д Стефаныг чулуугаар шидэж байсан хүмүүс чихээ таглаж байснаас харж болно. Энэхүү грек үгийн хамгийн сайн товчлол нь дуулгаваргүй байдал юм.

• Нүгэл нь тодорхой хуулийг зөрчих буюу — Бурханы шаардсанаас эсрэгээр үйлдэх юм (1 Иохан 3:4). Грек үг нь “хуульгүй” эсвэл “ёс бус” гэсэн утгатай хоёр үгнээс бүтдэг.

• Нүгэл нь Бурханы мэдүүлсэн, шаарддаг зүйлээс санаатайгаар өөр зүгт эргэх буюу цааш явах юм (Гэтлэл 32:7-8). Энэ хэсэгт Мосег Синаи уулан дээр байх үед хүмүүс Бурханаас татгалзаж эргэсэн талаар өгүүлдэг.

• Санамсаргүй үйлдэх нүгэл (Леви 4:2). Энэ төрлийн нүглийн талаар Хуучин болон Шинэ гэрээнд аль алинд нь өгүүлсэн байдаг. Еврей 9:7-д буй грек үг нь “мэдэлгүйгээр” эсвэл “ойлгоогүйгээр” гэсэн утгатай үйл үгнээс гаралтай тул “мэдэлгүйгээр үйлдэх нүгэл” юм. Энэ эшлэлд тэргүүн тахилчийн хүмүүсийн мэдэлгүйгээр үйлдсэн нүглийн төлөөх эвлэрүүллийн ажлын талаар өгүүлсэн.

Эдгээр үгс бидэнд нүгэл нь олон талыг хамарсан асуудал гэдгийг харуулж байна. Зарим үгс нүглийг хамгийн ерөнхий байдлаар илэрхийлдэг бол бусад нь Бурханы Үгийг сонсоогүйгээс үүдсэн уналт, хэм хэмжээнд хүрэхгүй унах, зориудаар төлөвлөсөн нүглүүд, мэдээгүйгээр болон санамсаргүй байдлаар үйлдсэн нүгэл зэргийг илэрхийлдэг. Аль ч тохиолдол нь бай, Есүс хүмүүсийг нүглээс нь аврахын тулд загалмай дээр үхсэн гэдгийг санах нь ерөөлтэй юм (Матай 1:21).

► Санаатайгаар үйлдэх нүгэл гэж юу вэ?

Санаатайгаар үйлдэх нүгэл нь Бурханы мэдүүлсэн хүслийг зориудаар зөрчих явдал юм (1 Иохан 3:4; Иаков 4:17, унших). Энэ нь хувь хүн буруу гэж мэддэг зүйлээ хийх, үргэлжлүүлэн хийх эсвэл зөвийг хийхгүй байх сонголт юм. Энэ бол санаатай буруу үйлдэл мөн.

1 Иохан 3:5-6-д Элч Иохан ийн бичжээ.

Нүглийг зайлуулахын тулд Тэр илчлэгдсэнийг та нар мэднэ. Түүнд ямар ч нүгэл байхгүй. Түүний дотор байгч хэн ч нүгэл үйлддэггүй. Нүгэл үйлддэг хэн ч Түүнийг үзээгүй, мэдээгүй.

Энд санаатайгаар үйлддэг нүглээ үргэлжлүүлэн хийсээр байх талаар ярьж байна. Энэ эшлэлийг жаахан дэлгэрүүлж орчуулбал: Есүсийн дотор байнга байгч хэн ч байнга эсвэл үргэлжлүүлэн нүгэл үйлдэхгүй, мөн байнга эсвэл үргэлжлүүлэн нүгэл үйлдсээр байгч хэн ч Түүнийг үзээгүй, Түүнийг мэдээгүй юм.

Хэрэв үүнийг хамгийн ерөнхий утгаар нь нүгэл гэж тайлбарлавал (санамсаргүй үйлдсэн болон мэдэлгүй үйлдсэн нүглүүдийг оруулаад) энэ нь маш ойлгомжгүй байдлыг үүсгэнэ. Христэд итгэгчид санаатай биш бүтэлгүйтэлдээ хэвээр байсаар байна. Харин энэ нүглийг (энэ эшлэлд буй) “Бурханы хуулиас санаатайгаар татгалзах” гэсэн утгатай гэж ойлговол энэ эшлэлийн утга бүрэн төгс илэрхийлэгдэнэ.

► Хүн төрөхдөө нүгэлт мөн чанартай төрдгийг та хэрхэн тайлбарлах вэ?

Удамшсан завхрал гажуудал нь хүн төрснөөс эхлээд нүгэлд татагддаг ёс суртахууны мөн чанарын гажуудал юм. Үүнийг заримдаа анхдагч нүгэл гэж нэрлэдэг. Энэ нь Адамын нүглийн улмаас бидэнтэй хамт төрдөг нүгэлт мөн чанар юм.

Бүх хүн төрсөн цагаасаа ёс бус зүйлд татагдах дур сонирхолтой байдаг (Дуулал 58:3, унших). Хүний мөн чанар нь төрөлх нүгэлт дур сонирхлоос болж аль хэдийн гажуудсан байдаг. Хүн сонголт хийж эхэлмэгцээ л нүгэл үйлдэж эхэлдэг. Хүн эргэн тойрон орчноосоо энэхүү нүгэлт дур сонирхлыг суралцаж авдаггүй.

Давид өөрийнхөө талаар нүгэл дотор эх минь намайг олж тээсэн, хилэнц дунд би төрсөн (Дуулал 51:5, унших) гэж хэлсэн байдаг. Тэр энд ээжийгээ ямар нэгэн буруу зүйл хийсэн гэсэн утгаар хэлээгүй. Харин хүүхэд эхийн хэвлийд бүрэлдэж байх тэр үед түүний мөн чанар нь аль хэдийн нүглээр ялзарсан байдаг гэсэн санаа юм.

Ялзарсан мөн чанараас болж хүмүүсийн доторх Бурханы дүр төрх гэмтсэн. Хүн бүр хувиа хичээсэн, нүглийг хүсэж, тэмүүлсэн төрдөг (Ром 3:10-12). Бурхан бидэнд хүсэл, хүч чадлыг өгөхөөс нааш бидний хүсэл нь зөвийг сонгох боломжгүй (Ром 6:16-17, унших).

Удамшсан завхрал гажуудал нь бардам зан, атаа жөтөө, үзэн ядалт, үл уучлал зэрэг дотоод нүглийг өдөөж байдаг. Мөн энэ нь нүглийн үйлсийг ч өдөөдөг.

Хүмүүс төрөлхийн, Бурханы эрх мэдэлд тэрслэх хандлагатай байдаг бөгөөд Түүний хуульд дургүйцдэг. Нүгэлтнүүд зөвхөн нүгэлт үйлсээрээ шүүгдээд зогсохгүй Бурханыг эсэргүүцсэн хандлагаараа ч шүүгдэх болно (Иуда 15, унших).

Нүгэлт мөн чанартай хүн угаасаа өөртөө төвлөрсөн, Бурханы болон бусдын эрх мэдэлд захирагдахын оронд өөрийн хүслийг нотлохыг оролдсоор байдаг. Тэр Бурханыг баярлуулахаас илүүтэй өөрийн хүслүүддээ сэтгэл хангалуун байхыг зорьдог. Тэр өөртөө итгэлтэй бөгөөд Бурханд найдахыг хүсдэггүй. Бурханы алдраас илүүтэй өөрийнх нь амжилт түүнд илүү чухал.

Хүмүүсийн оюун бодол харанхуйлсан учраас тэд сайн мууг нарийн ялгаж чаддаггүй (Ефес 4:17-18, унших). Тэд тэрслүү ертөнцөөр удирдуулж, Сатаны хяналт болон өөрсдийн нүгэлт хүслээ дагадаг. Ийнхүү тэд өөрсдийгөө Бурханы уур хилэнгийн дор авчирдаг (Ефес 2:2-3, унших). Тэдний төрөлх дур сонирхол нь хором бүрд нүгэл үйлдэх юм (Эхлэл 6:5).

Бурханы нигүүлсэлгүйгээр хүмүүс ямар ч сайн зүйлийг хийж чадахгүй, сайныг хийхийг хүсэх ч боломжгүй байв. Тэд гэмшиж, Бурханыг хайх ч чадваргүй (Иохан 6:44, унших), нүгэл, алдаа зөрчил дотроо үхсэн юм (Ефес 2:1). Теологичид энэ байдлыг “бүрэн завхрал гажуудал” гэж тодорхойлдог.

Удамшсан завхрал гажуудалд Бурханы нигүүлсэл хэрхэн хариу үйлдсэнийг мэдэх нь чухал юм. Нэгд, Бурханы хүч нь сайнмэдээний үг сургаалтай хамт ирдэг бөгөөд алдагдсан хүнд сайнмэдээнд хариу үйлдэх хүсэл, чадварыг өгдөг (Ром 1:16, унших). Улмаар хүн аврагдахдаа нүглийн хяналтаас чөлөөлөгддөг (Ром 6:11-14). Гэсэн хэдий ч шинэхэн Христэд итгэгчийн дотор удамшсан завхрал гажуудлын нөлөө үргэлжлэн байсаар байдаг.

Христэд итгэгч хүний доторх удамшсан завхрал гажуудлын нөлөө дараах байдлаар харагддаг.

1. Шинэхэн итгэгч заримдаа уруу таталтын үед өөрийн хүсэлтэй тэмцэлддэг.

2. Шинэхэн итгэгчийн хувьд эсэргүүцэх ёстой гэсэн буруу сэдлийг мэдрэх болно.

3. Шинэхэн итгэгч эдгээрийг ухамсарлахаасаа өмнө буруу хандлага, хариу үйлдэлтэй байж болно.

Шинэхэн итгэгч хүнд итгэлээ орхихгүй байхад нь урам зориг их хэрэгтэй байдаг. Учир нь түүний хувьд нүгэлт дур хүслүүд нь түүний дотор хэвээр байсаар байна гэж мэдэрсээр байгаа. Тэрээр Бурханы Сүнсээр хийгдсэн хүч ба өөрчлөлтийг үргэлжлүүлэн эрэлхийлэх ёстой болдог.

Пастор хүн шинэ итгэгчид тэвчээртэй хандах нь зүйтэй. Тэдний ярьдаг хийдэг зүйл нь үргэлж тогтвортой байдаггүй гэдгийг пастор ойлгох хэрэгтэй юм. Тэд асуудлаа шууд олж харахгүй ч байж болно.

Заримдаа хүн санаандгүй эсвэл мэдэлгүйгээр Бурханы Үгийг санамсаргүйгээр зөрчдөг. Леви 4:2-3-д энэ тохиолдолд хүн ямар нэг буруу зүйл хийснээ мэдмэгцээ тахил өргөх шаардлагатай гэдгийг хэлсэн. Христийн үхэл Хуучин гэрээний бүх тахил золиосыг орлодог тул Христэд итгэгч хүн санамсаргүй алдаа зөрчлөөс гэтэлгэгддэг гэдгийг бид мэднэ.

Бидний ойлгох ухаарах чадвар нэгэнт хязгаарлагдмал учраас санамсаргүй байдлаар алдаа зөрчил гаргах нь гарцаагүй. Алдаа зөрчлүүд нь бидний Бурхантай харилцах харилцааг тасалдуулдаггүй, учир нь тэдгээр нь Бурханыг гэсэн бидний хайртай зөрчилддөггүй юм. Түүний шаарддаг зүйлийг биелүүлэх нь Бурханыг бүрэн хайрлаж байгаа явдал гэж Тэр хэлсэн (Матай 22:37-40; Ром 13:8-10, унших). Бид мэдэхгүй зүйлийнхээ төлөө хариуцлага хүлээдэггүй (Иаков 4:17, унших).

Бид гэрэлд алхахдаа (бидний мэддэг үнэний дагуу амьдрах) бүх нүглээс цэвэрлэгдэж байдаг (1 Иохан 1:7, унших). Бид Христийн эвлэрүүлэлд итгэдэг учраас үл мэдэх алдаа зөрчлүүд бидний Бурхантай харилцах харилцааг тасална гэж айх хэрэггүй.

Бид санамсаргүй буруу зүйл хийснээ ухаарах үедээ гэмшиж, Бурханы уучлалыг асуун, амьдралаа Бурханы хүсэж байгаачлан засах ёстой юм. Үүнийг Леви ном заадаг. Бурханы Үгийг судалж, Ариун Сүнсийг дагаж, бусад итгэгчидтэй нөхөрлөн, төлөвших замаар бид Бурханы хүслийг санамсаргүй байдлаар зөрчдөг зан байдлаа өөрчлөх ёстой.

► Бид яагаад Бурханы хүслийг ойлгож, үүнийг илүү сайнаар үйлдэх ёстой вэ?

Бид Бурханы хүслийг илүү сайн ойлгож, бүрэн дагахыг хүсэх ёстой шалтгаанууд нь:

1. Бурханыг баярлуулдаггүй зүйлсийг хийхийг бид хүсдэггүй.

2. Буруу зүйл хийх нь муу үр дагавартай. Энэ нь санамсаргүй байсан ч мөн адил.

3. Бид Христэд итгэгч хүнийхээ хувьд сайн үлгэр дуурайл байх хэрэгтэй.

4. Хэрэв бид Бурханы хүслээс зайлсхийхийг оролдвол санаатай үйлдэх нүглийн буруутан болно.

Бид Бурханы хүслийг илүү ойлгож ухаарах тусам бидний амьдралд буруу зүйлс байгааг ойр ойрхон таньж хүлээн зөвшөөрдөг. Хэрэв тэрхүү буруу зүйлийг буруу гэдгийг нь мэдсэн хэрнээ хийхээр сонгож л байгаа бол энэ нь мэдэлгүйгээр үйлдэх нүгэл байхаа больдог. Хэрэв бид үүнийг өөрчлөхөөс татгалзвал тэрхүү буруу үйлдэл нь санаатай нүгэл болж хувирдаг.

Заримдаа теологичид нүглийн төрлүүдийг ялгадаггүй. Тэдний хувьд төгс төгөлдөр байдлаас доогуур бол бүх зүйлийг нүгэл, эсвэл зөвхөн санаатай үйлдлийг л нүгэл гэж хэлж болох юм. Харин бид нүглийн төрлүүдийг ойлговол Бурхан нигүүлслээрээ бидний төлөө юу хийхийг хүсдэгийг илүү сайн ухаарч чадна.

• Хүн дахин төрөх үедээ санаатайгаар үйлдэх нүглийг ялан дийлдэг. Дахин төрсөн хүн байнгын зуршил болгон нүгэл үйлддэггүй гэж Иохан тунхаглажээ (1 Иохан 3:4-9). Санаатай нүгэл нь христитгэлтэй нийцдэггүй. Санаатай тэрслэл жирийн итгэгч хүний зуршлын нэг хэсэг байж таарахгүй.

• Ариусгал нь хүний мөн чанар дахь нүглүүдийг шийдвэрлэх Бурханы ажил бөгөөд ингэснээр итгэгчид бүрэн дүүрэн ариун болдог (1 Тесалоник 5:23). Тэдний сүнс, сэтгэл, бие бүхэлдээ гэм зэмгүй болдог. Ариусгал нь хүний мөн чанар дахь нүглүүдийг ялан дийлдэг.

• Мэдэлгүй үйлдэх нүглүүд нь санаа зорилготойгоор дуулгаваргүй байх байдал биш бөгөөд нүгэлт мөн чанараас биш, харин унасан бие, оюун бодлоос гардаг. Газар дэлхий дээр амьдарч байгаа л бол энэ төрлийн нүглээс бүрэн чөлөөлөгдөх боломжгүй юм. Алдаршуулагдсан ариун хүмүүс амилуулагдахдаа бүх төрлийн нүглүүдээс бүрмөсөн, мөнхөд тусгаарлагдана.

► Итгэлээ шалгах хэсгийг хамгийн багадаа хоёр удаа хамтдаа уншаарай.

Хүний нүгэл нь анх-бүтээгдсэн хүмүүс Бурханд дуулгаваргүй хандах чөлөөт шийдвэр гаргаснаар үүсчээ. Есүсийг оролцуулахгүйгээр бүх хүн Адамын завхрал гажуудлыг өвлөн авсан бөгөөд нүгэл үйлдсэн гэм буруутай. Хүний алдаа зөрчлүүд нь Бурханы хуулийг зөрчиж болох ч Бурхантай харилцах бидний харилцааг тасалдуулдаггүй. Эцсийн шүүлтийн өмнө Бурханы уучлалыг хүлээн аваагүй нүгэлтэн бүр мөнхөд яллагдах болно.

(1) Эшлэл унших: Суралцагч тус бүр дараах эшлэлүүдээс нэгийг сонгоно. Дараагийн хичээл эхлэхээс өмнө эшлэлийг уншиж, энэхүү хичээлийн сэдвийн талаар тус эшлэлд юу гэж хэлснийг багцлан бичнэ.

• Ром 1:21-32

• Ром 3:10-20

• Галат 5:16-21

• Ефес 5:1-8

• Тит 1:10-16

• Иаков 4:1-4

• 2 Петр 2:9-17

(2) Сорил: Дараагийн хичээлийг 5-р хичээлийн сорилоор эхэлнэ. Сорилд бэлтгэж, асуултыг сайн судлаарай.

(3) Бусдад заах: Ангиас гадуур заах хуваарь гаргаж, тайлагнахаа мартуузай.

(1) Бид нүглийг ойлгох ёстой гурван шалтгааныг жагсаана уу.

(2) Нүгэл Бурханы буруугаас болоогүй гэдгийг бид хэрхэн мэдэх вэ?

(3) Дараах нүглүүдийг нэг өгүүлбэрээр тодорхойлно уу: санаатайгаар үйлдэх нүгэл, удамшсан завхрал гажуудал, санамсаргүй алдаа зөрчлүүд

(4) Бид яагаад Бурханы хүслийг ойлгож, үүнийг илүү сайнаар үйлдэх ёстой вэ?